David Russell Hulme

Penodwyd David Russell Hulme yn Gyfarwyddwr Cerdd yn 1992. Oherwydd y galw mawr amdano fel arweinydd, mae ei raglen brysur wedi mynd ag ef i rai o’r prif neuaddau cyngerdd ledled Prydain, Iwerddon, Awstralia, Seland Newydd, UDA a Chanada, ac mae wedi ymddangos mewn llefydd mor amrywiol ag Opera Frenhinol Canada, Gŵyl Christchurch (Seland Newydd) a Gŵyl Ryngwladol Gilbert&Sullivan Buxton. Mae’n gweithio’n rheolaidd gyda’r cwmni opera enwog, y Carl Rosa Opera Company, prif gwmni  operatâu Saesneg y byd, ac yn 2001 teithiodd o amgylch Awstralia a Seland Newydd, yn arwain Cerddorfa Talaith Victoria, yr Auckland Philharmonia a Cherddorfa Tŷ Opera Sydney, cyn mynd ar deithiau o gwmpas UDA a Chanada yn 2004 a 2006. 

Astudiodd David gerddoriaeth yn Aberystwyth o dan Ian Parrott, ac arwain o dan neb llai na Syr Adrian Boult. Cafodd raddau MA a PhD am ei ymchwil i Gerddoriaeth Prydeinig, ac mae wedi cyhoeddi’n eang, gan gynnwys erthyglau ar gyfer y New Grove Dictionary of Music and Musicians a Phroms y BBC. Cafodd ei ddisgrifio yn Opera fel ‘ein prif awdurdod ar lawysgrifau Sullivan’, bu’n  ymwneud yn agos â chynyrchiadau gan gwmnïau opera blaenllaw yn cynnwys Opera Cenedlaethol Cymru, Opera Cenedlaethol Lloegr (ENO), New Sadler’s Wells a D’Oyly Carte, yn ogystal ag eraill yn America ac Awstralia. Golygodd gerddoriaeth Sullivan a gweithiodd mewn rôl ymgynghorol ar gyfer ffilm Mike Leigh, Topsy-Turvy, a enillodd Oscar, ac fe gafodd ei argraffiad arloesol a llwyddiannus o Ruddigore, a gyhoeddwyd gan Wasg Prifysgol Rhydychen, ei berfformio’n ddiweddar gan Opera North. Mae’r gweithiau eraill y mae wedi’u golygu ar gyfer Gwasg Prifysgol Rhydychen yn amrywio o Paukenmesse Haydn i Ail Symffoni Walton.