Evaluation, Impact and Outcomes in working with children and young people in regional and minority language revitalisation efforts

Mae’r ddogfen hon yn adrodd ar brif drafodaethau gweithdy a drefnwyd gan Sefydliad Ymchwil, Data a Methodoleg Gymdeithasol ac Economaidd Cymru (WISERD), prosiect Canolfan Ymchwil Cymdeithas Sifil a gyllidwyd gan ESRC ar Addysg, Iaith a Hunaniaeth yng Nghymru a’r Alban.1 Cynhaliwyd y gweithdy yng Nghanolfan yr Urdd, Bae Caerdydd a rydym yn ddiolchgar i’r Urdd am ddarparu’r lleoliad.

Nod y gweithdy oedd dwyn ynghyd ymarferwyr yn ymwneud a gweithgareddau hyrwyddo ieithoedd rhanbarthol neu leiafrifol gyda phlant a phobl ifanc, yn benodol yng Nghymru, yr Alban, Gogledd Iwerddon ac Iwerddon. O ran cyd-destun, mae gwaith ieuenctid a gwaith gyda phlant a phobl ifanc yn wynebu heriau ynghylch sut i werthuso a dangos effaith a chanlyniadau eu gwaith. Mae gwaith mudiadau a chyrff sy’n ceisio hyrwyddo’r defnydd o ieithoedd rhanbarthol neu leiafrifol ymysg plant a phobl ifanc yn wynebu materion ychwanegol a heriau posibl o ran gwerthuso ac asesu effaith ieithyddol eu gweithgarwch. Yn ogystal a dangos canlyniadau yng nghyswllt gwaith ieuenctid yn gyffredinol, rhaid iddynt hefyd geisio dangos effaith eu gwaith ar sgiliau iaith a defnydd iaith pobl ifanc; rhywbeth sy’n anodd i’w ddangos.

O ganlyniad, ceisiodd y gweithdy ddarparu man ar gyfer trafod profiadau, i gyfrannu at adeiladu capasiti, i rannu a chreu arfer da ac i adnabod camau nesaf posibl o ran gwerthuso, effaith a chanlyniadau yn y gwaith o hyrwyddo ieithoedd.

Trefnodd y prosiect weithdy blaenorol ynghylch gwerthuso, effaith a chanlyniadau yng nghyd-destun gwaith ieuenctid yng Nghymru. Mae’r adroddiad briffio’n darparu cyd-destun ar gyfer yr ail weithdy hwn (gweler y ddolen isod).

Mae’r ddogfen hon yn crynhoi’r prif bwyntiau a gododd o’r cyflwyniadau a thrafodaethau grwpiau yn ystod y gweithdy. Mae’r cyflwyniadau ar gael ar wefan y prosiect (gweler y ddolen isod).